පැල්වත්ත සමාගමෙන් කිරි ගොවීන් නගා සිටුවමට කිරි ගව ගාල් සහ ශීත කිරීමේ මධ්‍යස්ථාන
අම්පාර සහ අනුරාධපුර දිස්ත්‍රික්කවල ගව තෘණ සඳහා ඉඩම් නොමැති වීම පිළිබඳ ගැටළු කිහිපයක් හේතුවෙන් කිරි ගොවීන් සඳහා විශේෂ ඉඩම් වෙන් කරන බවට ජනාධිපතිවරයා ලබා දුන් පොරොන්දුව පිළිබඳව පැල්වත්ත ඩේරි සමාගම සිය සතුට පල කරයි. පැල්වත්ත ඩේරි සමාගම, මෙම ඉඩම් ගැටලුව ඇතුළු කිරි කර්මාන්තයෙහි ගැටළු සම්බන්ධයෙන් සැලකිලිමත් වීම පිළිබඳව සිය කෘතඥතාව ජනාධිපතිවරයාට පුද කරන අතර රජය විසින් යෝජිත ඉඩම්වල කිරි මඩු හා ශීත කිරීමේ මධ්‍යස්ථාන පිහිටුවීමට සහාය වීම සඳහා සිය කැමැත්ත ප්‍රකාශ කර තිබේ.
කිරි කර්මාන්තය සඳහා විශේෂිත ඉඩම් වෙන් කිරීම මගින් යෝජිත ශීත කිරීමේ මධ්‍යස්ථාන සහ කිරි දොවන ස්ථාන අදාල ස්ථානයන්හි ස්ථාපනය කිරීම මගින් පිරිසිදු පරිසරයක ආරක්ෂිතව කිරි ලබා ගැනීමටත්, එකතු කිරීමටත්, ශ්‍රිත කිරීමේ මධ්‍යස්ථාන තුළ ගබඩා කිරීමටත් හැකිවන අතර එමගින් නියමිත වෙලාවට එම කිරි පිරිසිදුව හා සෞඛ්‍යාරක්ෂිතව සමාගමට ලබා දීමට උපකාරී වේ. මේ හරහා කර්මාන්තයේ ඵලදායිතාව සහ කාර්යක්ෂමතාව ඉහළ නැංවීමත්, ගුණාත්මක බවින් ඉහළ කිරි ලබා ගැනීම සහතික කිරීමටත් සමස්ත ක්‍රියාවලියම පශු වෛද්‍යවරුන් සහ සෞඛ්‍ය නිලධාරීන්ට පහසුවෙන් අධීක්ෂණය කර සහතික කිරීමටත් හැකියාව ලැබෙනු ඇත.
පැල්වත්ත සමාගමේ කළමණාකාර අධ්‍යක්ෂ අක්මාල් වික්‍රමනායක මහතා මෙම නව ශීතාගාර සහ කිරි දොවන ස්ථාන ස්ථාපනය කිරීම පිළිබඳව අදහස් දක්වමින් මෙසේ පැවසීය. “අප සමාගමේ කිරි දෙවීමේ, ගබඩා කිරීමේ, එකතු කිරීමේ හා ප්‍රවාහනය කිරීමේ මෙහෙයුම් කටයුතු වල සුරක්ෂිත භාවය සඳහා මෙම ශීතාගාර හා කිරිදොවන මධ්‍යස්ථාන පිහිටුවීම මගින් විශාල සහයක් වනු ඇතියි විශ්වාස කරනවා. එසේම මෙමගින් අපගේ නිෂ්පාදනවල සමස්ත නැවුම් බව සහ ගුණාත්මකභාවය ඉහළින්ම ඇති බව සහතික කිරීමට උපකාරී වනවා. පෝෂ්‍ය ගුණයෙන් පොහොසත් හා කල් තබා ගත හැකි නැවුම් කිරිවල යහගුණාංගවලින් පොහොසත් අපගේ නිෂ්පාදන පරාසය ඉහළ නැංවීමට මෙය තවදුරටත් සහාය වනු ඇති අතර අදාළ ප්‍රදේශ වල පවුල්වලට සහ සමස්තයක් වශයෙන් කිරි කර්මාන්තයටම මේ හරහා විශාල ශක්තියක් හිමිවේ.”
මෙම කිරි මඩු ගවයින්ට සහ ගොවීන්ට සුවපහසු වාතාවරණයක් ලබා දීම සඳහා අවශ්‍ය යටිතල පහසුකම් සහ අනෙකුත් පහසුකම් වලින් සමන්විත වේ. සෑම දිනකම නිරන්තර යාවත්කාලින කළ හැකි පරිසරයක් සහ ආරක්ෂිත හා සෞඛ්‍ය සම්පන්න පිළිවෙත් සහතික කිරීම සඳහා කිරි දෙවුම් පද්ධති ස්ථාපිත කෙරේ. එහිදී අතින් කිරි දෙවීමට වඩා යන්ත්‍රානුසාරයෙන් එය සිදුකිරීම මගින් අවදානම වඩාත් අවම කර ගැනීමට සහ ගුණාත්මකභාවය සහ සමස්ත කාර්යක්ෂමතාව වැඩි දියුණු කිරීමට උපකාරී වේ.
කිරි සැකසීමට පෙර මිදීම සහ නරක්වීම අවම කිරීම සඳහා ද මෙහිදී පහසුකම් සැලසේ. මෙම මධ්‍යස්ථාන පැල්වත්ත කිරි එකතු කිරීමේ පද්ධතියේ සෘජු නැවතුම් මධ්‍යස්ථානයක් ලෙස ක්‍රියා කරන අතර එමඟින් කිරි නියමිත වේලාවට සිසිල් කිරීමේ මධ්‍යස්ථාන හා කර්මාන්තශාලාවලට ළඟා වන බව සහතික කරයි. ගවයන්ගේ සෞඛ්‍යය හා සනීපාරක්ෂාව පිළිබඳව පරීක්ෂා කිරීමටත්, නැවුම් බව, ප්‍රතිශක්තිය සහ සෞඛ්‍යාරක්ෂිත බව නිවැරදිව ගණනය කර සහතික කිරීමටත් මෙම මඩු භාවිතා කළ හැකිය. මෙම ක්‍රමය මගින් විශේෂයෙන් විශාල ගව පට්ටි ඇති ගොවීන් ඇතුළු සියලුම කිරි ගොවීන්ට විශාල පහසුකමක් වනු ඇතැයි සමාගම විශ්වාස කරයි.
ගව තෘණ ලබා ගැනීමදී වනජීවී දෙපාර්තමේන්තුව, වන සංරක්ෂණ දෙපාර්තමේන්තුව සහ මහවැලි අධිකාරිය විසින් පනවා ඇති සීමාවන් පිළිබඳව මහඔය, වැලිකන්ද, සේරුවිල, රඹකැන්ඔය, පොල්ලේබැද්ද, කන්දෙගම සහ මාදුරුඔය, සහ අම්පාර දිස්ත්‍රික්කයේ අනෙකුත් ප්‍රදේශවල කිරි ගොවීන් සිය කනස්සල්ල පළ කළහ. කිරි ගොවින්ට ගව පාලනය සඳහා මින් පෙර වෙනම ඉඩම් ලබා දීමට පොරොන්දු වී තිබුණද, එවැනි ඉඩ ප්‍රමාණයක් නිසි පරිදි වෙන් කර නොතිබූ අතර එ් හේතුවෙන් කිරි ගොවීන්ට දැඩි නීති වලට යටත් වීමට සිදු විය. ඒ හරහා කිරි කර්මාන්තයට දැඩි බලපෑම් එල්ලවූ අතර සමස්තයක් වශයෙන් ගොවින් කර්මාන්තයෙන් ඉවත් වන්නට වූ අතර පැල්වත්ත සමාගම මේ සම්බන්ධයෙන් බලධාරීන්ගේ සහය ඉල්ලා සිටියේය.
පැල්වත්ත ක්ෂේත්‍ර නිලධාරීන් මේ පිළිබඳව අදහස් දක්වමින් “මෙම පියවර මගින් ඉඩම්වල අතරමංව සිටින ගවයින් 2000 කට අධික සංඛ්‍යාවක් මුහුණ දෙන ගැටලු මඟහරවා ගැනීමට හැකියාව ලැබෙනවා. නමුත් මාස ගණනාවක් තිස්සේ අපගේ ගවයින් බැලීමට අවස්ථාව හිමි නොවීම නිසා ගවයින්ගේ නිරෝගිබව පිළිබඳව අවධානමක් ඇති වීමට ඉඩ කඩ තිබෙනවා. පශුවෛද්‍යවරු පවා මේ පිළිබඳව පෙන්වා දී තිබෙනවා. මේ නිසා කිරි කර්මාන්තයට ඉඩම් වෙන් කිරීම අපට මහත් පිටිවහලක් වනු ඇති බවට විශ්වාස කරනවා.”
පැල්වත්ත සමාගම ගුණාත්මකභාවය, රසය සහ සෞඛ්‍යයසම්පන්නභාවය යන සිය නිෂ්පාදන ප්‍රමිතීන්ට අනුුකූලව යමින් නිරන්තරයෙන්ම ගෝලීය වශයෙන් පිළිගත හැකි ප්‍රමිතීන්ට අනුව ගුණාත්මකභාවයෙන් ඉහළ නිෂ්පාදන ජනතාව වෙත ලබා දීමට කැපවී සිටී. පැල්වත්ත කිරි ගොවින්ගෙන් එකතු කිරීමේ සිට සැකසීම සහ වෙළඳ පොළට පැමිණීම දක්වා ගතවන්නේ පැය 72ක් වැනි අවම කාලයකි. එමනිසා පැල්වත්ත කිරි නිෂ්පාදන වල නැවුම්බව, පෝෂණය, සහ පෝෂ්‍ය සංඝටක වල සුරක්ෂිතභාවය පිළිබඳව නැවත නැවතත් සහතික විය හැකිය.